Categorie: 19-05

Mien chicske verzamelt

Jao, mien hittepetit heet ’n nuierwètse hobby
ze is hielemaol vaan dezze tied
ze zuut sjiek oet

haor häör gans netjes
lipkes um te pune
ze zuut sjiek oet

edere week geit mien mamzèlke
nao ne speciaolis
iech weet neet wee

mien poeijerdoes is ein
geweldige triene
zoen vrommes welt ederein

iech huur ’t uuch dinke
dat is miech ein mèt ’n deur hobby
dat kos väöl geld

iech kin uuch dat gans ierlek vertèlle
haor hobby kos bijna niks
want ze hoof d’r niks veur te doen

veur ’n hobby mos te actief zien
en dat is zie neet
dat kos gein geld

’t taxigeld veur al die ritjes
dat maag iech betaole
zie spaort bönnekes
zie spaort stöb

Geer snap allemaol wel boerum iech gein foto touwveugde??
Iech kin gein portrèt mie vinde

©Jean van Gasteren/19-05-2024

Iech bin nog neet zoe wiet

bin nog mèt vaan alles bezeg
geer kint miech wel aonduie

meh doa gaon iech ech neet gawwer door

iech höb get mie tied nudeg
kin iech dat vaan uuch kriege

of mot iech dao iers veur door mien kneeje goon

jaore höb iech miech motte spooje
en noe höb iech eindelek e bitsje rös in mien koont
en daan begint geer zoe

vergeet neet, iech bin al eine ganse tied aon ’t jaoge
en dat is noe sjoen gedaon
nog evekes,

iech bin nog neet zie weed
nog evekes, nog evekes mie tied
iech zit noe aon de wied

©Jean van Gasteren/19-05-2024

Iech kin ’t neet wie heer
gere wèl iech ‘t liere
op miene weeg nao bove
kom iech vaan alles tege

drink iech miech e pèlske
mesjiens ouch wel gèt groets
höb iech tied um nao te dinke
kom iech van alles tege

es iech bin aongekoume
is miene tied veurbij
slaon iech e kruiske
en lèg miech te röste

Leef en leid
in mien druime

©Jean van Gasteren/19-05-2024