15-05-2024
In Mestreech kuump eine ganse hoege toren
Dao weurt al hiel väöl gebouwd in Mestreech, meh dat is niks nuits en dat höb geer zeker al gehuurd dao kuump nog väöl mie.
Veural oostelijk van de Maos is zier in trek.
Steeds mie lui en jao ouch de lui vaan de Zjustitie wèle hei gehoesvest weure.
Meh ’t allerbelaankrieks en allerlètste nuits, in ’t Oostelijk deil vaan Mestreech kuump eine ganse hoege tore.
Zoe hoeg, bekans zjus zoe hoeg wie de Sint Pietersberg.
Boerum, veurwat, wiezoe….?
’t weurt tied dat die lui oet ’t Oosten ouch op uuch kinne neerkieke
Jao, dat is hel nudeg
De wieze koume oet ’t Oosten en wèlle de Stadse Braniemeekers oet ’t Westen good kinne zien, in de gate hawe.
Hoonderde jaore höbe zie nudig gehad um ziech te bewieze aon uuch
Veer slete ’n compromis
’t Stadscentrum , boe haos geine Mestreechteneer kuump, boe te bekans neet mie mèt diene oto maags koume of wèlt koume. Miljaar de mós ’n dikke portemonnee höbe um in ’t Weste te woene op ein paar vierkante meter.
Iech vraog miech aof boe geer dat greun allemaal welt plante, de GROETE Staat, De GROETE Gracht, ’t Vriethof, aon de Merret bij ’t Frietehoes, echt gein idee…..iech zou ’t neet wete, gein idee.
Nein, ich wèl ’t neet mèt-make dat al die lui die zoe gruuts praote nao ’t Ooste koume
Bleif ezzebleef dao
Veer wèlle de Statie gaar neet oondergronds, ouch de böse neet in ’t Ooste vaan de Statie, veer höbe al dee elend neet nudeg.
Veer bouwe wel e paar brögkes veur us-zellef die veer umhoeg zette zoedat veer ……..
Geer maag uuch bröge hare, dao kins te nog neet ins mét d’n tram euver.
Es veer ;t nudig vinde um met such in kontak te lieve daan doen veer dat wel met de fiets of gans gewoon e emeelke.
Nein veer goon mèt in euze tied
Slope ’t Station, verplaatsen alles wat nudeg is um vaan Station Noord get sjoels te make boe veer allemaal jao ouch geer gruuts op kint zien.
Same nudige veer John of ziene opvolger oet um ’t tracé aon te legke of op zien mins nao te kieke .
En daan, en daan, en daan, daan goon veer röste zoe wie veer nog niets höbe gedoon en maag geer es godbleef us advisere, us gooje raod geve, meh daan wel in ’n tempo boe veer vaan gedeend zien.
Veer beginne gans obbenuits, gans euvernuits,
Veer bouwe gein Stadcentra meh Wiekcentra boe de lui neet wied veur dene te loupe, alles verspreit, niks mie concentrere euverjal ’t nudege.
En jao, awwerwèts klassiek euverdèk en alles sjoen gans egaal en dan höbe veer ouch gein euverlas vaan us Mestreech-Aachen-Vleegmechienes.
Vergeet neet, veer beslisse zelf ever ’t Oosten, ’t Oosten vaan de Maos.
Eigelek maag geer Belsj weure, offfff riechting Belsj maaaage bouwe, meh dat loate veer oan uuch, dat maag geer gans zellef beslisse
Haw eur Universiteit, veer zien content en bouwe wel gèt nuits. Veer wèlle ’t us kinder neet aondoen in e aw verbouwde brak, sorry, monumentaal pand dat zier awwerwets, oneconomiesch is veur de natuur te hoesveste. Veer wèlle euze toekoms neet op ’t spel zètte.
Veer verplaotse ’t Mestreechs voetbalstadion wel nog ’t aongepas nui Station Noord en make vaan ’t aw Stadion e gigantisch einvoudeg kentoercomplex.
Vaanoet ’t Westen kint geer daan gemekelek en einvoudeg mèt eine of twie beut eurer de Maos of doezende fietse noa touw kint koume. Geer maag ouch loupe, dat is good get beweging.
Nein, veer zien hei gans zelfveurzienend.
Behalve daan nog dee HOEGE toren, meh geleuf us dee kuump als ierste, ech woer zoetot veer uuch in de gate kinne hawwe, es veer daovaan deenke veurdeil te höbe.
Meh ierlek, iech ach dee kans gans klein want veer bedreupe us wel
En jao, veer bloze neet vaan uze HOEGE tore.
Daanke veur ’t leze, danken veur eure tied, noe is ’t aon us.
Ezzebleef.
©Jean
